පූජ්‍ය ලුවං පෝ අනන් අකිඤ්චනෝ

පූජ්‍ය ලුවං පෝ අනන් අකිඤ්චනෝ හිමියන් 1954 මාර්තු 31 වන දින මධ්‍යම තායිලන්තයේ සරබුරි නගරයේ අනන් චන්-ඉන් යන නමින් උපත ලැබීය.

කුඩා කල සිටම දෙමාපියන් සමඟ ප්‍රදේශයේ පන්සලට ගොස් පිරිත් සජ්ඣායනයට සහ භික්ෂූන් වහන්සේලාට වන්දනාමාන කිරීමට පුරුදු වූ උන්වහන්සේ, බුදුරදුන් සහ බුදුදහම කෙරෙහි ගැඹුරු ශ්‍රද්ධාවක් ඇති කර ගත්හ. අධ්‍යාපනය සාර්ථකව නිම කළ උන්වහන්සේ සියම් සිමෙන්ති සමාගමේ ගණකාධිකාරීවරයෙකු ලෙස සේවය ආරම්භ කළහ. කඩිසර සේවකයෙකු වුවද, බෞද්ධ ප්‍රතිපදාවට දැඩිව ඇදී ගිය උන්වහන්සේ තම විවේක කාලය ආසන්න ආරණ්‍යයක ගත කරමින් භාවනා පුහුණුවට යොමු වූහ.

පසුකාලීනව අටසිල් සමාදන් වෙමින්, දිනපතා උදෑසන භික්ෂූන් වහන්සේලාට දන් පිළිගන්වා රැකියාවට ගොස් සවස් කාලයේ ආරණ්‍යයට පැමිණ භාවනාවේ නිරත වූහ. තම ජීවිතය බුදුදහමට කැප කිරීමට තීරණය කළ උන්වහන්සේ පැවිදි බිමට පත්වීමට අධිෂ්ඨාන කර ගත්හ.

1975 ජූලි 3 වන දින, ගෞරවනීය ලුවං පෝ චා මහා තෙරුන් වහන්සේ යටතේ පැවිදි උපසම්පදාව ලබා, "කනස්සල්ලෙන් තොර තැනැත්තා" යන අර්ථය ඇති "අකිඤ්චනෝ" යන පාලි නාමය ලැබූහ.

ලුවං පෝ චා මහා තෙරුන් යටතේ පුහුණුව

තායි වනගත සම්ප්‍රදායේ ප්‍රමුඛතම භාවනා ආචාර්යවරයෙකු වූ පූජ්‍ය ලුවං පෝ චා (බෝධිඤාණ තෙර) හිමියන් 1918 දී උපත ලබා වයස අවුරුදු 20 දී පැවිදි විය. 1946 දී වනගත භික්ෂු ජීවිතය ආරම්භ කරමින් දුෂ්කර භාවනා ප්‍රතිපදාවක නිරත වූහ.

ලුවං පෝ මුන් ඇතුළු ශ්‍රේෂ්ඨ වනගත ආචාර්යවරුන් ආදර්ශයට ගනිමින් වසර ගණනාවක් දුෂ්කර වනාන්තරවල භාවනා කළ ලුවං පෝ චා හිමියෝ, පසුව ලොව පුරා ප්‍රචලිත වූ වත් නොං පා පොං ආරණ්‍යය පිහිටුවූහ.

වත් නොං පා පොං ආරණ්‍යයේදී ලුවං පෝ අනන් හිමියන් ලුවං පෝ චා හිමියන්ගේ සමීපතම උපස්ථායකයා ලෙස කටයුතු කරමින් භාවනාව, විනය සහ ධර්මයේ ප්‍රායෝගික භාවිතය පිළිබඳ සෘජු මඟපෙන්වීම් ලැබූහ.

ලුවං පෝ චා හිමියන් සිහිය, සරල බව, විනය සහ සිත විමර්ශනය කිරීම අවධාරණය කරමින් සෘජු හා ප්‍රායෝගික ලෙස ධර්මය දේශනා කළ අතර, උන්වහන්සේගේ ඉගැන්වීම් ලොව පුරා භාවනා මධ්‍යස්ථාන දක්වා ව්‍යාප්ත විය.

ලුවං පෝ අනන් හිමියන්ගේ ධර්ම ප්‍රතිපදාව

වත් නොං පා පොං හි මුල් වසර හතර ගත කළ ලුවං පෝ අනන් හිමියෝ, පසුව තම ආචාර්යවරයාගේ මඟපෙන්වීම මත ඊසාන් වනාන්තරවල සහ මධ්‍යම තායිලන්තයේ ඝන කැලෑවල වසර පහක් පුරා චාරිකා කරමින් දැඩි දුෂ්කරතා, වනසතුන්ගේ උපද්‍රව සහ මැලේරියා රෝගාබාධ මධ්‍යයේ භාවනා ප්‍රතිපදාව ගැඹුරු කළහ.

1984 දී උන්වහන්සේ තවත් භික්ෂූන් දෙනමක් සහ සාමණේර හිමිනමක් සමඟ රයොං පළාතේ ඝන වනාන්තරයක අද වන විට "වත් මාප් ජන්" (සඳ එළියෙන් බැබළෙන කඳුකර ආරණ්‍යය) ලෙස හැඳින්වෙන ආරණ්‍ය සේනාසනය පිහිටුවූහ.

පසුගිය දශක කිහිපය තුළ වත් මාප් ජන් ලොව පුරා භික්ෂූන් සහ ගිහි සැදැහැවතුන් ආකර්ෂණය කරගත් ප්‍රමුඛ පෙළේ භාවනා මධ්‍යස්ථානයක් බවට පත්විය.

ලුවං පෝ අනන් හිමියන් භාවනාවේ සහ සිහියේ මූලිකාංග පැහැදිලි කරමින් විවිධ පසුබිම්වල සිටින අයට තේරුම් ගත හැකි අයුරින් ධර්මය දේශනා කිරීමට ප්‍රසිද්ධය. උන්වහන්සේගේ ඉගැන්වීම් ලුවං පෝ චා හිමියන්ගේ සම්ප්‍රදාය ඉදිරියට ගෙන යයි.

අද වන විට වත් මාප් ජන් හි ප්‍රධාන අනුශාසක ලෙස කටයුතු කරන උන්වහන්සේ ඕස්ට්‍රේලියාව, බ්‍රසීලය, ශ්‍රී ලංකාව ඇතුළු රටවල් රැසක අන්තර්ජාතික ශිෂ්‍ය පිරිසකට මඟ පෙන්වති.

අවංක ප්‍රතිපදාව, සිහිය, මෛත්‍රිය, ප්‍රඥාව සහ විමුක්තිය කරා සිත පුහුණු කිරීමේ වැදගත්කම උන්වහන්සේගේ ජීවිතයෙන් සහ ඉගැන්වීම්වලින් මනාව පිළිඹිබු වේ.